Se bestemor! Vi danser sammen

Kurator og prosjektleiar Tone Erlien Myrvold er svært nøgd både med breidda i museumslandskapet og at utstillinga får møte publikum ved små og mellomstore museum over heile landet. Det er no mange museum i Noreg som arbeider aktivt med samværsdansen som immateriell kulturarv. Når turneen er gjennomført, vil heile 24 norske og 2 nordiske museum ha vist utstillingar produsert av Museene danser gjennom prosjektperioden.

Den nye utstillinga «Se bestemor! Vi danser sammen» har fått eit særleg vakkert og gjennomarbeidd uttrykk – noko som skuldast eit solid lag av fagfolk: tilsette ved Sff, lydkunstnar og teknikar Øystein Fjeldbo, og utstillingsprodusent Inger Christine Årstad.

For kvart museum skal det skapast lokalt innhald i form av video, tekst, foto og arkivmateriale. Dette skjer i tett samarbeid mellom Sff, museet sjølv og lokale danseentusiastar. Utstillinga skal òg vere ein levande møteplass for lokale danseklubbar og -lag, som kan bruke rommet til arrangement, kurs og framsyningar.

«Se bestemor! Vi danser sammen» har i tillegg ei nettutstilling der publikum kan utforske endå meir av arkivmaterialet frå dei ulike stadene. Nettutstillinga er dynamisk, og blir jamleg oppdatert medan hovudutstillinga vandrar frå museum til museum.